O Programa de Emprego Santiago Sustentable III no que participaron 16 mozos e mozas desempregados menores de 30 anos, está subvencionado polo Fondo Social Europeo, a Xunta de Galicia e o Concello de Santiago de Compostela.

A directora xeral de Formación para o Emprego e Orientación, Zeltia Lado, e o alcalde de Santiago, Xosé A. Sánchez Bugallo participaron hoxe na clausura e entrega de diplomas do programa de emprego de garantía xuvenil Santiago Sustentable III  no que 16 mozas e mozos recibiron formación durante 12 mese en dous certificados de profesionalidade: desenvolvemento de produtos audiovisuais multimedia interactivos, da familia profesional de Imaxe e Son, e desenvolvemento de aplicacións con tecnoloxía web, da familia profesional de Informática e Comunicacións. 

Ademais da formación, os participantes realizaron diferentes traballos audiovisuais e de programación web para o Concello de Santiago, como vídeos de promoción do patrimonio natural e diferentes aplicacións web. O produto máis salientable desenvolvido no marco deste programa foi a app "Árbores Senlleiras de Santiago" que poderá descargarse de forma gratuíta. Trátase dunha aplicación participativa, coa que se pretende que a cidadanía de Santiago colabore na elaboración dun catálogo de Árbores Senlleiras de Santiago, propoñendo exemplares singulares que se poidan atopar no ámbito rural, en fincas particulares e noutros lugares da cidade, co fin de poñer en valor o patrimonio natural do Concello e concienciar da importancia de conservación do mesmo.

“Creo que podedes estar moi satisfeitos de formar parte do equipo deste proxecto tan ambicioso, que vai estar ao servizo de toda a veciñanza que queira saber máis do patrimonio natural da cidade”, indicou Zeltia Lado.