MINERVA é un proxecto de formación para o emprego impulsado polo Concello de Santiago de Compostela, e cofinanciado polo Fondo Social Europeo Plus. Nace co propósito de mellorar a empregabilidade das persoas en situación de desemprego, combinando formación, orientación e prácticas profesionais.
O proxecto promove unha aprendizaxe práctica e adaptada ás demandas actuais das empresas, cunha especial aposta polo sector dixital e tecnolóxico, sen esquecer ámbitos tradicionais como a hostalaría, o comercio, a construción, a xardinaría ou os coidados. En total, desenvolveranse 60 itinerarios formativos, que sumarán máis de 13.000 horas de formación e chegarán a 960 participantes.
As principais persoas destinatarias son:
- Persoas desempregadas de longa duración.
- Mulleres.
- Maiores de 45 anos.
- Persoas con discapacidade.
- Inmigrantes.
- Minorías.
- Outras persoas en situación de vulnerabilidade.
Hoxe, 24 de outubro de 2025, aprobáronse as Bases Reguladoras de Participación nos itinerarios formativos do proxecto MINERVA, que recollen o marco normativo, os requisitos de acceso, o procedemento de selección, a documentación que hai que presentar, así como os dereitos e obrigas das persoas participantes, en consonancia coa normativa do Fondo Social Europeo Plus (FSE+) 2021–2027 e coa Orde
TER/701/2023.
